अभिनेता अनमोल केसी स्टारर फिल्म ‘ड्रिम्स’ बाट सानदार डेब्यू गरेकी साम्राज्ञी आरएल शाह अहिलेकी मोस्ट डिमान्डेड र महँगी अभिनेत्री मध्येकी एक हुन् । गत वर्ष प्रदर्शनमा आएको फिल्म ‘कायरा’ मा अभिनेता आर्यन सिग्देलसँग रोमान्स गर्न १० लाख बुझेकी उनले हालै छायांकन सकिएको फिल्म ‘मारुनी’ मा १५ लाख पारिश्रमिक पाइन् । यसमा उनले अभिनेता पुष्प खड्कासँग रोमान्स गरेकी छन् । अभिनेतासरह पारिश्रमिक बुझ्ने उनले दशैंमा प्रदर्शनमा आउन लागेको निर्देशक अशोक शर्माको फिल्म ‘रातो टीका निधारमा’ मा १६ लाख बुझेकी छन् । ‘कायरा’ बक्सअफिसमा असफल भए पनि पारिश्रमिक नघटाएकी उनले यसअघि अशोकको फिल्म ‘जय भोले’ समय व्यस्तताका कारण गर्न पाएकी थिइन् । फिल्मवृतमा भने उनले गाउँले भूमिका भएका कारण रिजेक्ट गरेको चर्चा चलेको थियो । तर, यसको निर्देशक शर्मा र अभिनेत्री शाह दुबैले खण्डन गरेका थिए । साम्राज्ञीले ‘जय भोले’ मा काम गर्न नसक्नुको पछाडि गाउँले भूमिका नभएर समय व्यस्तता रहेको बताएकी थिइन् । आफू गाउँले भूमिकामा काम गर्न पनि तयार रहेको उनको भनाई थियो । अन्ततः ‘रातो टीका निधारमा’ मा साम्राज्ञी र अशोकको टिमअप भएको छ । यस फिल्ममा साम्राज्ञी गाउँले भूमिकामा प्रस्तुत हुँदैछिन् ।
यो फिल्ममा उनले निर्देशक शर्माका छोरा अंकितसँग रोमान्स गर्दैछिन् । आइतवार फिल्मको औपचारिक निर्माण घोषणा कार्यक्रममा अभिनेत्री साम्राज्ञीले आफूलाई फिल्मको स्क्रिप्ट औधि मन परेका कारण काम गर्न राजी भएको बताइन् । उनी भन्छिन्, ‘मैले पहिलो पटक स्ट्रोङ रोल पाएकी छु । नेपालमा महिलाप्रधान फिल्महरु खासै बनेका छैनन् । यो पूर्ण महिलाप्रधान फिल्म हो ।’ आफू सधैं बोल्ड क्यारेक्टर मात्र गरेर बोरिङ भइसकेको पनि उनी बताउँछिन् । ‘म अरु क्यारेक्टर पनि गर्न सक्छु भन्ने सधैं लागिरहन्थ्यो । हरेक कलाकारलाई सधैं भिन्न-भिन्न रोल गर्न मन हुन्छ, त्यो मलाई पनि थियो/छ । ‘रातो टीका निधारमा’ बाट अशोक दाईले मलाई प्ल्याटफर्म दिनुभएको छ । मैले गर्न खोजेको क्यारेक्टर यसमा पाएकी छुँ’, उनी खुसी देखिइन् । उनले अहिले आफूलाई राम्रो स्क्रिप्ट आइरहेको पनि बताइन् । उनी अगाडि भन्छिन्, ‘मलाई पहिला सधैं एउटैखाले क्यारेक्टर गर्यौं भन्ने प्रतिक्रियाहरु आउने गर्दथे । मलाई पनि भिन्न रोल गर्न मन थियो । तर, सधैं एउटैखाले मात्र स्क्रिप्ट आउने गर्थ्यो । नभए त्योभन्दा खत्तम आउथ्यो । मलाई फिल्म छनोट गर्नै गाह्रो हुन्थ्यो । यसपाली भने राम्रो-राम्रो स्क्रिप्टहरु आइरहेको छ । ‘रातो टीका निधारमा’ को स्क्रिप्ट सुनेपछि मलाई बेग्लै लाग्यो । किनकि, मैले आजसम्म त्यस्तो क्यारेक्टर गरेकै छैन ।’ यस फिल्ममा पहिलो पटक आफू गाउँले भूमिकामा देखिन लागेको पनि उनी आफैंले स्पष्ट पारिन् । साम्राज्ञी भन्छिन्, ‘गाउँले भूमिका भए पनि फिल्मको स्क्रिप्ट एकदमै राम्रो छ ।’ निर्देशक शर्मा पनि स्क्रिप्ट सुनेलगत्तै साम्राज्ञीले कुनै हिचकिचाहट फिल्म साइन गरेको बताए । उनले भने- ‘‘जय भोले’ मा पनि मैले साम्राज्ञीलाई नै लिन खोजेको थिएँ । तर, विभिन्न कारणले सहकार्य हुन सकेको थिएनँ । सञ्चारमाध्यममा भने अर्कै कुरा आयो, जुन पूर्ण रुपमा असत्य छ ।’’
प्रतिक्रिया दिनुहोस्