दोलखा, २८ बैशाख ।। आफूले पाउने सामाजिक सुरक्षा भत्ता राज्यलाई नै फिर्ता गर्ने मेलुङ गाउँपालिका वडा नं. ६ सिम्रासका खिलहरि पौडेललाई सम्मान गरिएको छ । सामान्य गाउँमै खेती किसानीबाटै जीविकोपार्जन गरेका पौडेलले आफूलाई आफ्नै परिश्रमले खान पुग्छ भन्दै राज्य दिने सुविधा लिएका थिएनन् । पौडेल वशं महासंघ नेपाल जिल्ला कार्यसमिति दोलखाको दोस्रो अधिवेशनको अवसरमा खिलहरिलाई मरणोपरान्त सम्मान गरिएको हो । खिलहरिको ३ महिना अघि ९४ वर्षको उमेरमा निधन भइसकेको छ । खिलहरि अहिले यो संसारमा नभए तापनि बाचुञ्जेल राज्यले दिएको सुविधा समेत आफूभन्दा निम्न वर्गका लागि भन्दै सामाजिक सुरक्षा भत्ता राज्य लाई नै फिर्ता गरेर अनुकरणीय कार्य गरेकाले सम्मान गरिएको पौडेल वशं महासंघ नेपाल दोलखाका अध्यक्ष दिलसागर पौडेलले जानकारी दिए ।
सामान्य परिवारको व्यक्ति भए तापनि स्वाभिमानी रहेको छिमेकीहरुले बताए । सिम्रासकै लालप्रसाद पौडेलका अनुसार खिलहरि आफैंले परिश्रम गरेरै जीवनयापन गर्नु पर्छ र आफूलाई समस्या नभए राज्यले दिने सुविधा लिनु हुन्न भन्ने समाजकै उदाहरणीय व्यक्ति रहेको बताए । ‘राज्यले दिएको सुविधा लिनु पर्छ भनेर हामीले पनि पटक पटक सम्झायौं’ उनले भने ‘तत्कालिन गाविसका कर्मचारीहरु र जनप्रतिनिधिहरु समेत नाम लेखाउन पटक पटक घरमै आउँदा पनि मैले पाउने आफूभन्दा गरिबहरुलाई दिनु भन्दै फर्काएका थिए ।’ खिलहरि पौडेलकी बुहारी मञ्जू पौडेलले सकुञ्जेल उहाँले नै काम गर्नु भयोे, नसक्ने हुँदा आफूलाई चाहिने खर्च हामीले आवश्यक खर्च व्यवस्थापन गरिदिएको बताइन् । संस्कृत भाषाको राम्रो अध्ययन गरेका खिलहरि समाजकै नाम चलेका पण्डित थिए ।
अधिवेशनको अवसरमा दोलखा जिल्लाभरका कुलपूजा र गोठ पूजा गर्ने धामीहरु दिपक पौडेल, लालप्रसाद पौडेल, चन्द्रबहादुर पौडेल, दिलबहादुर पौडेल, लालबहादुर पौडेल, चित्रबहादुर पौडेल, पुष्कर पौडेल लगायत पनि सम्मानित भएका थिए । त्यसैगरी पौडेलबाट गौरीशंकर गाउँपालिकाका प्रथम उपाध्यक्ष उर्मिला पौडेल, भीरकोट गाविसका पूर्व गाविस अध्यक्ष ज्ञानेन्द्र पौडेल, कर्मचारी संचय कोषका पूर्व प्रबन्धक श्यामकुमार पौडेल, केन्द्रीय सदस्य कृष्णगोपाल पौडेल, रामु पौडेल र सञ्चय पौडेललाई पनि सम्मान गरिएको थियो । नियमित कुलपूजा र गोठपूजा, आफ्नै जग्गामा भवन सहितको संरचना र दसैंको सामुहिक टिका लगाउने जिल्लाकै उत्कृष्ट समाजको रुपमा पौडेल बन्धु कुल समाज र पौडेल खत्री कुल समाज गौरीशंक १ लाई समेत सम्मान गरिएको छ ।
पौडेल बंश महासंघ नेपालका अध्यक्ष हरिराम पौडेलले ऐतिहासिक पृष्ठभूमि र पूर्खाको योगदानलाई सम्मान गर्दै सबै अनुशासित र एकअर्काप्रति सहयोगी हुनु पर्ने बताउनु भयो । उहाँले देशभरको कुलपूजा विधि फरक फरक भएकाले त्यसलाई एकरुपता ल्याउन पहल गरिरहेको जानकारी दिनुभयो ।
केन्द्रीय उपाध्यक्ष विजय पौडेलले मुठी दानबाट सामाजिक काम गर्न सकिने र आर्थिक संकलन गर्न सकिने जानकारी दिनुभयो । मोरङको सुन्दरहरैचामा मुठीदानबाटै सुविधा सम्पन्न भवन, मन्दिर, किरियापुत्री भवन लगायतका संरचना बनाउन सफल भएको उदाहरण पेश गर्नुभयो । आफूले कमाएको सम्पति सामाजिक कामका लागि केही दान गरे धर्म हुने शास्त्रीय भनाइ रहेको समेत उल्लेख गर्नुभयो ।
अर्का केन्द्रीय उपाध्यक्ष दिपकप्रसाद पौडेलले ऐतिहास र आफ्नो पहिचानका लागि वंशावली महत्वपूर्ण रहेको बताए । वंशावलीमा आफ्नो अनुभव सहित उनले अब हरेक ठाउँका समाजले आफ्नो वंशावली तयार पार्नुपर्नेमा जोड दिनुभयो ।
पौडेल वशं महासंघ दोलखाका अध्यक्ष दिलसागर पौडेलले दोलखाको मेलुङ, भेड्पू, सुकाठोकर, सहरे, जफे, भीरकोट, मिर्गे, जुँगू, सुनखानी र झ्याँकुमा ३५० घरमा १ हजार ६ सय पौडेलहरु रहेको जानकारी दिनुभयो ।
गंगा पौडेलको नेतृत्वमा नयाँ कार्यसमिति
पौडेल वशं महासंघ नेपाल दोलखा जिल्ला कार्य समितिको दोस्रो अधिवेशनले कालिञ्चोक गाउँपालिका वडा नं. ७ सुनखानीका गंगा पौडेलको अध्यक्षतामा नयाँ कार्यसमिति चयन गरेको छ । समितिको उपाध्यक्षमा टिकाबहादुर पौडेल, सचिव बलराम पौडेल, सहसचिव राजु पौडेल, कोषाध्यक्षमा युवराज पौडेल चयन भएका छन् । त्यसैगरी सदस्यहरुमा रमेश पौडेल सुनखानी, रमेश पौडेल भीरकोट, विसु पौडेल, चित्रबहादुर पौडेल, अम्बिका सुवेदी पौडेल, सरिता कार्की पौडेल र पूर्णबहादुर पौडेल रहेका छन् ।
यस्तै, स्वास्थ्य उपसमितिमा युवराज पौडेल, प्रवास उपसमितिमा दिपक पौडेल, महिलामा अम्बिका पौडेल, कुलपुजामा दिपक पौडेल संयोजक निर्वाचित हुनु भएको छ ।
नवनिर्वाचित जिल्ला अध्यक्ष पौडेलले चाँडै अक्षय कोष व्यवस्थापन, वंशावली संकलन र प्रकाशन, कुलपूजा विधिमा एकरुपता लगायतको काम गरिने प्रतिबद्धता गर्नुभएको छ ।
तस्विर सौजन्य : दिपक पौडेल, जुगु, दोलखा
प्रतिक्रिया दिनुहोस्