आईपीएलमा सन्दीप आवद्ध टोली दिल्ली क्यापिटल्सले आज खेल्दै

आईपीएलमा सन्दीप आवद्ध टोली दिल्ली क्यापिटल्सले आज खेल्दै

काठमाडौं – शनिबारदेखि शुरु भएको इन्डियन प्रिमियर लिग (आईपीएल)मा नेपाली क्रिकेट स्टार सन्दीप लामिछानेआवद्ध टोली दिल्ली क्यापिटल्सले आइतबार (आज) खेल्दैछ ।

मूम्बई इन्डियन्ससँग मूम्बईको घरेलु मैदानमा यो सिजनको आफ्नो पहिलो खेल खेल्दै दिल्लीले सिजनको सुरुवात गर्नेछ । तीन पटकको आईपीएल उपाधि विजेता रोहित शर्माको कप्तानीमा रहेको मुम्बईविरुद्ध आईपीएलमा सुखद् सुरुआतको खोजिमा दिल्ली रहेको छ ।

गत सिजनमा समुह चरण पार गर्न नसकेको दिल्ली यो सिजनमा सुखद् सुरुवात गर्दै उपाधि जित्ने दाउमा देखिएको छ । आईपीएलको यो सिजनमा नाम र लोगो नै परिवर्तन गरी दिल्लीले विषेश रुपमा आफ्नो यात्रालाई अगाडि बढाउने तयारी गरिरहेको छ ।

गत सिजनबाट दिल्लीमा आवद्ध भएका नेपाली लेगस्पिनर सन्दीप लामिछाने आजको खेलमा मैदान उत्रेलान् ? यो प्रश्नको उत्तर आम नेपाली क्रिकेट प्रशंसकका लागि चासोको विषय बनेको छ ।

यसअघि, अस्ट्रेलियाको विग बास लिगमा मेलबर्न स्टारबाट लिगको पहिलो खेलमै मैदान उत्रिने अवसर पाएका सन्दीप एसोसियट राष्ट्रबाट यो सिजनमा विग वास लिग खेल्ने पहिलो खेलाडी समेत बनेका थिए ।

त्यस्तै, विश्वभरका ट्वान्टी—२० लिग खेलिरहँदा दिल्लीले सधै सन्दीपलाई पछ्याइरहेको थियो । सन्दीपको प्रदर्शनका कारण आजको खेलमा दिल्लीले सन्दीपलाई मैदानमा उतार्ने सम्भावना अधिक देखिन्छ । तर दिल्लीका अर्का लेग स्पिनर अमित मिश्रा भएका कारण उनी प्लेइङ–११ मा पर्ने सम्भावना कम छ । गत वर्षको सिजनमा पनि अनुभवी अमितकै कारण उनले सुरुवाती खेलमा अवसर पाउन सकेका थिएनन् ।

तर, यस पटक दिल्लीले सुरुवातीमै सन्दीपलाई अवसर दिनु बाध्यता जस्तै बनेको छ । किनकी पछिल्लो एक वर्षमा उनले विश्वभरका प्रतिष्ठित टि–२० फ्रेचाइज लिगहरुमा आफूलाई अब्बल सावित गरिसकेका छन् । त्यसबाहेक दिल्लीका प्रशिक्षक रिक्की पोन्टिङ भएका कारण पनि उनको सम्भाबना अझ बढी देखिन्छ ।

गएको सिजनमा दिल्ली समूह चरणबाट बाहिरिसकेपछि मात्र सन्दीपले टिमका लागि तीन खेल खेल्ने अवसर पाएका थिए । तीन खेलमा उनले ५ विकेट लिएपछि दिल्लीले उनको क्षमताको प्रसंशा गरेको थियो ।

यो सिजनमा दिल्लीले रिटेन गरेका १४ जना खेलाडीमा सन्दीप परेसँगै उनी दिल्लीको पहिलो रोजाईमा पर्ने सम्भावित खेलाडी रुपमा हेरिंदै आएको पाइन्छ ।

त्यतिमात्र नभएर सन्दीपले अस्ट्रेलियामा खेल्दा होस् वा क्यारेबियन प्रिमियर लिग नै किन नहोस् अथवा नेपालकै लागि खेल्दा पनि दिल्लीले उनको खेलको प्रशंसा गर्दै आइरकेको थियो ।

बंगलादेशमा महँगा सावित भएका सन्दीपलाई दिल्लीले सधैँ प्रेरक प्रसंगसहित उत्साह भरिरहँदा आईपीएलमा उनले दिल्लीबाट विषेश स्थान पाउने सम्भावना देखिएको छ । त्यसबाहेक आजमात्रै दिल्लीले सन्दीपको फोटो सामाजिक सञ्जालबाट सार्वजनिक गर्दै लेखेको छ– ‘खेलका लागि अब धैर्य गर्न सकिदैन, समय भइसकेको छ ।’

प्रतिक्रिया दिनुहोस्