‘जात्रै जात्रा’ को रिलिज मिति सार्वजनिक

‘जात्रै जात्रा’ को रिलिज मिति सार्वजनिक

काठमाडौं – फागुन १७ गते रिलिज हुने भनी टिजर समेत सार्वजनिक गरिएको फिल्म ‘जात्रै जात्रा’ निर्धारित समयमा रिलिज भएन । कारण थियो, फिल्मको शूटिङ चलिरहँदा मुख्य अभिनेता विपिन कार्की मोटरसाइकल दुर्घटनामा परे ।

अहिले भने यो फिल्मको नयाँ रिलिज डेट फाइनल भएको छ । निर्माण टिमले ‘जात्रै जात्रा’ को एक पोस्टर सार्वजनिक गर्दै रिलिज मिति आउट गरेको हो ।

‘जात्रा’को सिक्वेलमा बनेको ‘जात्रै जात्रा’ अर्को वर्षको वैशाख २७ गतेबाट रिलिज हुने फाइनल भएको हो । प्रदिप भट्टराइले निर्देशन गरेको यो फिल्ममा विपिन कार्की, रविन्द्रसिंह बानियाँ, वर्षा राउत, रविन्द्र झा, दयाहाङ राई लगायतका कलाकारको शीर्ष भूमिका रहनेछ ।

चलचित्रमा यादव पौडेल र सिंगे लामाको लगानी रहेको छ । टिजरका आधारमा फिल्ममा दयाहाङ राईलाई भिलेन अवतारमा देख्न सकिनेछ ।

‘जात्रा’ को सफलतासँगै यो फिल्म थप प्रतीक्षित बनेको छ । फिल्म डार्क कमेडी विधामा निर्माण भएको हो ।

प्रतिक्रिया दिनुहोस्