विप्लवमाथिको प्रतिबन्धले नेकपाभित्रै असन्तुष्टि

विप्लवमाथिको प्रतिबन्धले नेकपाभित्रै असन्तुष्टि

काठमाडौं–बिहीबार प्रकाशित सबै दैनिक पत्रिकाले सरकारले नेत्रविक्रम चन्द विप्लव समूहलाई लगाएको प्रतिबन्ध र यसले निम्त्याउने असहजताका विषयलाई प्राथमिकताका साथ छापेका छन् । कान्तिपुर दैनिकले ‘प्रतिबन्धले तरंग, नेकपाभित्रै असन्तुष्टि’ शीर्षकमा मुख्य समाचार छापेको छ ।

विप्लव समूहको क्रियाकलापलाई प्रतिबन्ध लगाउने सरकारको निर्णयले सत्तारुढ दल नेकपाभित्रै असन्तुष्टि बढाएको छ । पार्टीका मुख्य नेताहरुले छलफल नै नगरी निर्णय लिएको भन्दै यो सरकारी निर्णयको स्वामित्व लिने विषयमा समस्या हुने टिप्पणी गर्न थालेका छन् । सरकारको निर्णयपछि नेकपाको सचिवालय सदस्यहरु पार्टी अध्यक्ष पुष्पकमल दाहाल प्रचण्ड निवास खुमलटार पुगेर छलफल गरेका थिए ।

सत्तारुढ दलमा यो निर्णयबारे दुई प्रकारका धारणा आइरहेका बेला प्रमुख प्रतिपक्षी दल नेपाली कांग्रेसले भने यो निर्णयको स्वागत गरेको छ । कांग्रेसका सभापति शेरबहादुर देउवाले जताततै बम विस्फोट गराएर सर्वसाधारणमा आतंक मच्चाउनेलाई कारबाही गरिनुपर्ने भन्दै सरकारको निर्णय ठीक भएको बताएका छन् । तर, नेत्रविक्रम चन्द विप्लवले भने सत्तासामू एकरत्ति नझुक्ने दाबी गरेका छन् । उनले दमन गरे मुखतोड प्रतिरोड गर्ने चेतावनी पनि दिएका छन् ।

त्यस्तै नेपाली कांग्रेसले पत्रकार सम्मेलन गर्दै जनअभिमतको व्याख्या गर्न सरकारसँग माग गरेको, नेपालमा लगानीको वातावरण बनाउने नाममा बनाइएका संयन्त्रले झन झमेला थप्दै गरेको खबर प्राथमिकतामा छन्।

प्रतिक्रिया दिनुहोस्