लालपूर्जाविहीन किसानलाई अविलम्व लालपुर्जाको व्यवस्था गर्नुपर्छ: प्रचण्ड

लालपूर्जाविहीन किसानलाई अविलम्व लालपुर्जाको व्यवस्था गर्नुपर्छ: प्रचण्ड

कास्की– नेपाल कम्युनिष्ट पार्टीका अध्यक्ष पुष्पकमल दाहाल‘प्रचण्ड’ले मुलुकको विकास र समृद्धिका लागि नयाँ गतिका साथ अघि बढ्नुपर्ने आवश्यकता रहेको औल्याएका छन् ।

राष्ट्रिय भूमि अधिकार मञ्चको पाँचौ राष्ट्रिय अधिवेशनको उद्घाटन गर्दै अध्यक्ष दाहालले मुलुकमा देखिएको भूमिसम्बन्धी समस्याको स्थायी समाधानका लागि सरकार क्रियाशील रहेको बताए । उनले वर्षौंदेखि जमिनमा रगत र पसिना बगाउने किसान जमिनको मालिक बन्नुपर्ने तर्क गर्दै लालपूर्जाविहीन किसानलाई अविलम्व लालपुर्जाको व्यवस्था गर्नुपर्ने बताए ।

उनले आफू गणतन्त्र नेपालको पहिलो प्रधानमन्त्री हुँदा भूमि सम्बन्धी समस्या समाधान गर्न पहल गरेको भएपनि राजनीतिक अस्थिरताका कारण समस्या समाधान हुन नसक्नु दुर्भाग्यपूर्ण भएको तर्क गरे । भूमि सम्बन्धमा नीतिगत व्यवस्था भएपनि कार्यन्वयनको पाटो चुनौतीपूर्ण रहेको र सरकार  कार्यन्वनका लागि क्रियाशील रहेको बताए ।

उनले वर्षौदेखि काम गरिरहेका लालपूर्जा विहीन किसानलाई लालपूर्जा दिने विषयमा सरकारले हस्ताक्षेप गरेरै भए पनि अघि बढ्नुपर्ने बताए । त्यस्तै सुकुम्बासीहरुको व्यवस्थापनका विषयमा विकल्प नहुन्जेलसम्म कम्तिमा परिचयपत्रसम्मको भए पनि व्यवस्था गर्नुपर्ने तर्क गरे ।

नेपालको आर्थिक समृद्धिको कुरा भूमिकसँग, भूमि सुधारसँग, भू–उपयोग नीतिसँग, कृषिको आधुनिकीकरणसँग जोडिएको हुँदा जमिनमा वर्षौदेखि खेतीपाति गर्नेहरु नै जमिनको मालिक बनाउनेबाटै शुरु हुने तर्क गरे । त्यसका लागि आफ्नो विशेष जिम्मेवारी र प्राथमिकता रहनेसमेत प्रतिवद्धता व्यक्त गरे । यदि यस्ता समस्या समाधान हुन सकेनन् भने सरकारको औचित्यसिद्ध हुन नसक्ने जिकिर गरे ।

उनले भने–‘पार्टीको नाम कम्युनिष्ट राख्दैमा जनताले मान्छन् भन्ने होइन, जबसम्म जनताका समस्या समाधान गर्न सकिंदैनन्, भूमिसँग सम्बन्धित समस्या सुल्झिदैनन् तबसम्म जनताले कम्युनिष्ट पार्टी भनेर बाँकी राख्दैनन् । यो विश्वमै देखिएको उदाहरण हो ।  जनताले दिएको अभिमतलाई कदर गर्नसक्नुपर्छ ।’

उनले राष्ट्रिय अधिवेशनले मुलुकमा बलियो सन्देश जानुका साथै भू उपयोगि नीति बनाउने तथा भूमी सुधार नीति वैज्ञानिक बनाउने विषयमा महत्वपूर्ण सावित हुने बताए ।

सोमबारदेखि शुरु भएको महाधिवेशन फागुन २९ गतेसम्म चल्ने छ ।

प्रतिक्रिया दिनुहोस्