सहयोगको नाममा ठगी धन्दा

सहयोगको नाममा ठगी धन्दा

मलेसिया– करिब दुई महिनाअघि एक नेपाली युवती चन्दा उठाउन सिफारिस माग्दै क्वाललाम्पुरस्थित जलनआङपाङमा रहेको नेपाली दूतावासका प्रथमसचिव विनोद मुखियाको कार्यकक्षमा पुगिन्।

‘काठमाडौंमा हामी शिशु स्याहार केन्द्र चलाइरहेका छौं, उक्त केन्द्रका निम्ति सहयोग जुटाउन मलेसियामा रहेका नेपालीबाट चन्दा उठाउन चिठी बनाइदिुप-यो’ भन्दै ती युवतीले मुखियालाई आग्रह गरिन्। मुखियाले उनको पासपोर्ट हेरे। ‘ट्राभल’ भिसामा मलेसिया पुगेकी रहिछिन्। 

राजदूत बिदामा नेपाल गएकाले मुखिया नै कार्यबाहक थिए। उनले जथाभावी चन्दा उठाउन दूतावासले सिफारिस दिन नसक्ने भन्दै ती युवतीलाई फर्काइदिए। 

क्वालालाम्पुरमा प्रायः नेपाली भेटिरहने कोतारायाको एक नेपाली रेस्टुरेन्टमा तीन साताअघि बुटवल घर बताउने एक युवती चन्दा माग्दै पुगिन्। बुटवलमा आफूहरूले अनाथ आश्रम सञ्चालन गरिरहेको र त्यहाँ रहेका मिर्गौलापीडित र ब्लड क्यान्सरपीडित बालबालिकाको उपचारका लागि खर्च अभाव भएकाले सहयोग जुटाउनु उनको उद्देश्य थियो। साथमा आश्रम र त्यस्ता बालबालिकाका केही तस्बिर पनि बोकेकी थिइन् उनले। झण्डै एक महिना क्वालालाम्पुर बसेर उनले नेपाली रेस्टुरेन्ट तथा जमघटस्थलमा घुमेर सहयोग उठाइन्।

रेस्टुरेन्टमा खान आउने नेपालीहरूले १ मलेसियन रिंगेटदेखि ५० सम्म दिन्थे। उनी दैनिक ३ पटकसम्म कोतारायाका नेपाली रेस्टुरेन्ट पुग्थिन्। कोतारायाका नेपाली रेस्टुरेन्ट सञ्चालकहरूले ‘ट्राभल’ भिसामा आएकी ती युवती एक महिना क्वालालाम्पुर बसेर करिब २० हजार रिंगेट अर्थात झण्डै साढे पाँच लाख नेपाली रुपैयाँ संकलन गरेर लगेको अनुमान गरे। 

प्रतिक्रिया दिनुहोस्