३२ कटेका हटाउन नेविसंघमा दौडधुप

३२ कटेका हटाउन नेविसंघमा दौडधुप

काठमाडौं – नेपाली कांग्रेसको भ्रातृ संगठन नेपाल विद्यार्थी संघको तदर्थ समितिमा ३२ कटेका नेताहरू हटाउन पार्टीभित्र तेस्रो धार भनिएको समूहले दौडधुप सुरु गरेको छ।

नेता कृष्णप्रसाद सिटौला समूहका विद्यार्थी नेताहरूले ३२ कटेकालाई तदर्थ समितिमा राख्न नहुने भन्दै ‘लविङ’ सुरु गरेका हुन्। यसअघि पार्टीले विधान बनाउँदै गर्दा नेविसंघमा उमेर हद लगाउने भए पार्टीमा पनि लगाउनुपर्छ भन्दै आएको तेस्रो धारका विद्यार्थी नेताहरू पछिल्लो समय उमेर हद लगाउन सक्रिय भएको हो। उनीहरू विधान बनाएपछि कार्यान्वयन गर्नै पर्ने भन्दै पार्टीका नेताहरूको ध्यानाकर्षण गराइरहेका छन्।

‘विधान बनाइसकेपछि त्यसको रक्षा हामीले गर्नुपर्छ’, तेस्रो धारका विद्यार्थी नेता कुन्दनराज काफ्ले भन्छन्, ‘त्यसका लागि हामी जुनसुकै प्रयत्न बाँकी राख्दैनौँ।’ नेविसंघमा उमेर हद लगाउन माग गर्दै सिटौला समूहका निवर्तमान केन्द्रीय सदस्यहरूले बुधबार पार्टी सभापतिसहित तीन नेतालाई भेटेका छन्। उनीहरूले सभापति शेरबहादुर देउवा, वरिष्ठ नेता रामचन्द्र पौडेल र नेता अर्जुनरसिंह केसीलाई भेटेका हुन्। तीन नेताहरूलाई तेस्रो धाराका विद्यार्थीहरूले नेविसंघको तदर्थ समितिमा उमेर हद लगाउन माग गरे।

यस्तै, उनीहरूले क्याम्पसका इकाई अध्यक्ष र स्ववियु सभापतिलाई पनि महाधिवेशनमा प्रतिनिधि बनाउन माग गरे।

प्रतिक्रिया दिनुहोस्