सडक विस्तार आयोजना सफल पार्न कावासोतीमा समन्वय समिति गठन

सडक विस्तार आयोजना सफल पार्न कावासोतीमा समन्वय समिति गठन

नारायणगढ। बुटवल सडक विस्तार आयोजनाका सम्बन्धमा कावासोती नगरपालिकामा विहिवार भएको छलफलबाट नगर प्रमुख चन्द्र कुमारी पुनको संयोजकत्वमा ११ सदस्यीय समन्वय समिति गठन गरिएको छ ।

नगर उपप्रमुख प्रेम शंकर मर्दनिया सह संयोजक र पूर्व पश्चिम राजमार्ग आसपास रहेका कावासोतीको वडा नम्बर दुईका वडा अध्यक्ष लक्ष्मी प्रसाद पौडेल , तीनका अध्यक्ष अमृत श्रेष्ठ , आठका अध्यक्ष आनन्द गुरुङ्ग, नौका अध्यक्ष नेत्र प्रसाद खतिवडा ११ का अध्यक्ष शारदा प्रसाद अधिकारी र १६ अध्यक्ष एकादत्त वस्ति , कावासोती नगरपाकिलाका प्रमुख प्रशाशकिय अधिकृत रोशन ज्ञवाली सम्मिलित समन्वय समिति गठन गरिएको हो ।

आयोजनाको काम गर्दाका बखत कुनै पनि समस्या आएमा , बादविवाद आएमा सहजीकरण गरेर काम गर्न सहज वातावरण गराउन सहयोग पुर्याउने काम , समितिले गर्ने छलफलमा सहभागि वडा नम्बर दुईका वडा अध्यक्ष लक्ष्मी प्रसाद पौडेलले जानकारी दिए ।

छलफलका क्रममा खानेपानी , विद्युत् , सोलारबत्ति लगायतका पूर्वाधारहरुको ब्यवस्थापन गरेर मात्रै आयोजनाको काम सुरु गर्न माग गरिएको कावासोती नगरपालिकाका प्रमुख प्रशाशकिय अधिकृत रोशन ज्ञवालीले जानकारी दिए ।
खानेपानीका पाईप लाईनमा प्रत्यक्ष असर पर्ने हँुदा पाइपको ब्यवस्थापन , विद्युत्का तारलाई अन्डरग्राउण्ड , निर्माणको चरणमा धुलो धुँवाले स्वास्थ्य र वातावरणमा प्रत्यक्ष असर पार्ने हुँदा न्युनिकरण , सडक पोलमा सोलारबत्ति अनिवार्य जडान गर्नुपर्ने र कावासोती नयाँ जिल्लाको सदरमुकाम भएकाले सडक निर्माण गर्दा बिच भागमा रुख विरुवा रोपेर हरित क्षेत्र समेत निर्माण गर्नुपर्ने आयोजनाका प्रतिनिधीहरुसंग माग गरिएको ज्ञवालीले बताए । छलफलबाट निस्किएका मागहरु तर्फ आयोजनाले वेवास्ता गरेमा काम गर्नका लागि सहज वातावरण बन्न नसक्ने भन्दै यी काम पुरा गरेपछि मात्रै काम सुरु गर्न सकिने जानकारी आफुहरुले गराएको ज्ञवालीले बताए ।

चार लेन सडक विस्तरको काम यसै आर्थिक वर्षभित्रबाट गैडाकोटको थुम्सि र कावासोतीको खरकट्टा जंगल क्षेत्रबाट सुरु गर्ने योजना अनुसार अहिले आयोजनाले छुने स्थानीय तहहरुमा छलफललाई तिब्रता दिएको आयोजनाका इन्जिनीयर सुरेश पौडेलले बताए । छलफलका क्रममा स्थानीय तहबाट पूर्वाधारको ब्यवस्थापन गर्न आग्रह गरिएको भए पनि आफुहरुले विशुद्ध रुपमा सडक मात्रै निर्माण गर्ने जिम्मा पाएकाले केहि अप्ठेरो हुने पौडेलले बताए । सम्बन्धित स्थानीयको माग सम्बोधन नभए काम गर्न असहज हुने हुँदा यस विषयमा माथी कुरा राख्ने र ब्यवस्थापन गर्नतर्फ आफुहरुले पहल गर्ने उनको भनाई छ ।

आयोजनाको काम पहिलो चरणमा जंगल क्षेत्रबाट सुरु गरिदै छ । बजार क्षेत्रबाट सुरु गर्दा जनजिवनमा बढि प्रभाव पर्ने हुँदा सुरुमा जंगल क्षेत्रमा काम सम्पन्न गरेपछि बजार क्षेत्रमा काम सुरु हुने पौडेलले बताए । सडक विस्तार अन्र्तगत बजार क्षेत्रमा छ लेन , जंगल क्षेत्रमा चार लेन र दाउन्ने क्षेत्रमा तीन लेन निर्माण गरिने जनाईएको छ ।

प्रतिक्रिया दिनुहोस्